أول تاج فى حياتى

على الرغم من إن مش طبعى الصراحة الشديدة ... إنما إتينا دبستنى


فى التاج ده و مضطر أجاوب عليه بصراحة


1- هل كنت طالب شاطر فى المدرسة ؟


أيام المدرسة كنت شاطر بشكل مستفز - لكن مع ذلك كنت تاعب ماما فى المذاكرة


ليه بقى ؟!؟ ....... ببساطة


لإنها كانت بتشوفنى بلعب طول السنة و تقول فى نفسها لما تيجى الأمتحانات و تسألنى فى المقرر


هتبان الفضايح وهتفش غليلها من لعبى و شقاوتى


و كانت المفاجأة إنى برد على كل الأسئلة


عشان انا كنت بركز فى الحصة تركيز شديد و كنت تقريبا بعرف كل حاجة بتتقال


و بعد كده برجع أعمل اللى أنا عايزه فى البيت بقى


و لكن ... هذا النظام المريع منفعش فى الكلية


لسبب أنا شرحته فى بوست قديم .. ممكن تقروه لو مهتمين بالتفاصيل


بس أنا بقى لا أبكى على اللبن المسكوب


و طبعا الحال ده لازم هيتصلح إن شاء الله



2- أحب مادة , أكره مادة ؟


حيث إنى بحب التفكير بشكل مفزع , فطبعا الرياضة و الفيزياء من أكتر المواد المحببة لقلبى


و فى الكلية , بحب الكومبيوتر و الإلكترونكس و الإمبيديد سيستم (جايز عشان بتربط بين الإتنين).. ..


حد فاهم حاجة ؟!؟



أما عن الكره ... فالعربى كان عقدة حياتى ...


يكفى إنى أقولكم إن أنا نقصت 20 درجة فى ثانوية عامة .. منهم 11 عربى ... بس كده


3-كنت عايز تطلع ايه وانت صغير ؟


كنت بقول لأهلى زمان انا عايز أطلع مخترع :D


و لكنهم أقنعونى بإن المخترع ده واحد خد اللقب ده لما عمل حاجة محدش عملها قبله


و إنه أصله مهندس أو عالم ... فأنا قلت لهم خلاص أنا عايز أبقى مهندس


والحمد لله طلعت مهندس