بقايا من حنان زائل
عمر حد فيكم حس إنه فى مشكلة عشان واحد غيره فى مشكلة ؟!؟
أو بمعنى أصح حس إنه متضايق عشان معرفش يحل مشكلة حد غيره ؟!؟
أنا النهارده كنت رايح الكلية .... و انا فى السكة , لقيت ست كبيرة فى السن كده قاعدة على الأرض , و حاطة إيدها على خدها و قدامها كرتونة بيض و كل البيض اللى فيها وقع على الأرض و إتكسر .... و بقيت مش عارف أعمل إيه ؟!؟ - كنت عايز أروح لها و أقولها معلش يا ستى و أدى تمن كرتونة تانية ...... مش جايز تكون الكرتونة دى أكل لولادها و لا أحفادها و لا حاجة
مع إنى أنا من بعد ما دخلت الجيش - فضلا عن حالة الفراغ العاطفى المرعب اللى أنا عايشه من زمان - قلبى نشف و بقيت قاسى لكن الصراحة كان شكلها يقطع القلب ... جايز كانت عايزة اللى يطبطب عليها و يقولها معلش ..يا ريتنى كنت روحت عنها شوية - جايز كان ربنا دخلنى الجنة فيها
و مرة برده كنت راكب أتوبيس , شفت ست كده (شابة يعنى) عماله تعيط ... و كنت مش عارف أعمل إيه , خفت أى تصرف يكون تدخل سئيل منى ... بس مجاش فى مخيلتى سبب يخلى واحدة تعيط فى الشارع - أكيد بقى مقهورة أو مصدومة - بس ساعتها فكرت فى إنها أكيد معندهاش اللى يحتويها بالقدر الكافى , و إلا مكانتش عيطت فى الشارع
posted by Ahmad El-Saeed at
2:19 am
4 Comments:
أبو حميد
إعجابي برقة قلبك لا يدعني أخفي عليك ان تلك حيلة قديمة جدا ومستهلكة في النصب والتسول تظهر وتختفي كل فترة
وهي عملية دائمة تأتي نتيجتها بنجاح فموقف البيض المكسر وأمامه سيدة أو اللبن المسكوب وجواره سيدة تبكي يحن القلب كثيرا وخصوصا ان التعويض المفروض لزرع الفرحة داخل المرأة ليس بالشيئ الغالي
سيدي يؤسفني ان أقول لك أن تلك عملية نصب جعلت حتى قلبك بعد تولد فيه جزء من القسوة في فترة الجيش لم يستطع غلا ان يحن ويتعاطف في هذا الموقف
مش عارف يا شقير ... هى وجهة نظر واقعية جدا .. بس إنت عارف لما تبقى عارف النصب و الحيل دى و تحس مرة واحدة إن فيه موقف زى ده و إنه حقيقى مش مصطنع , يعنى أنا بتعدى عليا مواقف كتير جدا بعرف من قبل ما الحدث يبدأ إن ده فيلم غرضه الأول و الأوسط و الأخير هو النصب
إنما واحدة هتيجى قدام جامعة القاهرة و ترمى بيض مكسور على الأرض أو حتى تكسر كرتونة بيض عشان النصب ... لسه شايفها صعبة شوية .. بس على الرغم من كل شيئ , إحتمالك وارد بشدة
الواحد بعد ما دخل القوات المسلحة , بقى فعلا ممكن يصدق أى حاجة وسخة تتقال عن أهل البلد دى , و خاصة بعد اللى بنشوفه بعنينا جوه
شكرا على مجيئك يا شقير
كنت داخلة متحمسة قوى للرد لقيت رد شقير صدمنى
فكرنى بموقف قديم كنت قريته فى مدونة الوايت ويزرد عن طالبة جامعية بتدعى إن فلوسها خلصت ومحتاجة جنيه علشان تروح والموقف حصل قدامها مرتين لنفس البنت
مش عارفة فعلا ممكن أقول إيه .. لكن غالبا السلبية دى مش بتكون فيا مع الناس اللى أنا أعرفهم .. تفتكر ده مش كفاية؟؟
mirage:
الموقف اللى إنتى بتحكى عليه ده موقف بيحصل كتير و ممكن الواحد يقع فيه مرة و ميقعش فيه تانى ... و غير كده إنه منتشر و مفقوس جدا
المشكلة الحقيقية إن العاطل بيتاخد مع الباطل فى الحالات اللى زى دى ... فبالتالى أصبح تمييز المظلوم صعب
لو إنتى يا رحيل متأكدة من الناس اللى إنت عارفاهم و متأكدة من ظروفهم , فأنا أظن إن ده كفاية . على الأقل أحسن من مفيش.
اللى أنا بقى مستغربله إن اللى علق على الموضوع , علق على الشق الأول منه بس , هو محدش قرا الشق التانى ؟!؟
Post a Comment
Subscribe to Post Comments [Atom]
<< Home