مرحب يا جماعة .. منورين كلكم
يا رب تكونوا كلكم بخير إن شاء الله ...
أنا أحمد السعيد ... حد فاكرنى ؟!! -- طبعا أكيد فيه ناس فيكم فاكرننى لسه .. و ناس أكتر لأ ... و ناس أكتر و أكتر ما يعرفونيش أصلا و لا يعرفوا حتى إن كان عندى بلوج زمان و لغيته لأسباب حكيها قريب إن شاء الله
أنا رجعت للكتابة عن حبة من العمر عدوا و لحبة كمان جايين مش عارف هيبقوا قد إيه
بس أنا رجعت أحكى ... و أفكر ... أشوف الناس دى بتعمل إيه .... و لو عجبنى اللى بيعملوه أشجع و أشارك .. و لو معجبنيش أتكلم و أناقش
أنا لما عملت البلوج الأولانى عملته عشان الناس بتعمل بلوج ... مش عشان أنا عايز أعمل بلوج ... و ده كان من أهم أحد أسباب ضعف الكتابة فيه ... الكلام كان طالع من دماغهم على لسانى , أشوف إيه اللى بيعجبهم و أكتبه
أنا نفسى كل واحد هيعمل بلوج جديد , ييجى هنا الأول أحكيله عن غلطاتى الأولانية عشان ما يقعش فيها ... عن حاجات كتير تعبتنى عشان أعرفها و أتأكد من صحتها .... عن حاجات بفكر فيها و لسه معنديش يقين منها .... و عن عيوب عندى كتيـــر بحاول أصلحها
و جايز اللى هيقرا منكم البوست ده و شاف البلوج القديم بتاعى هيفهم أنا قصدى إيه ... و اللى مش فاهم ما يستعجلش , كل شيئ هيوضح بعد كده
بس أنا متعود من زمان إنى ما أبصش ورايا أبدا .. و لو بصيت , أشوف اللى غلطت فيه و أصلحه , و مقولش يا ريت و لو إذا كنت عملت
لإن الكلام مش هيغير اللى حصل .. لكن الفعل ممكن يغير اللى هيحصل
محتاج رأيكم .... أحب أسمعكم ..... نتكلم و نتناقش
و مفيش أى مانع
إننا نفكر مع بعض
إضغط على الصورة للتكبير
