دور على الناس ... فى نفوس الناس

أحيانا لما بفكر , بلاقى ببساطة إن الإنسان مننا لا يمكن يعيش على وتيرة واحدة أبدا .... شيئ متعب جدا

حتى لو البنى أدم مبسوط على طول , هيحس إنه خايف من أى جديد يطرأ على حياته و هو ميعرفوش

يخاف من مواقف لو حصلت هيتصرف فيها إزاى ؟؟

......

اوقات كتير بحس إنى مرتاح و ساعتها مبسألش عن السبب

و أوقات تانية بريح نفسى بكلام لا يمكن كان يقنعنى لو كان حد قالهولى ... لازم أقوله أنا لنفسى , و بصوت عالى و مسموع كمان

و أوقات كتير بحس إنى مخنوق لإنى بحس إنى بدور على اللى يفهمنى و بيتهيألى كتيييير إنى مش هلاقيه

ساعات بحس إن المفروض هو كده و كده , و أرجع تانى يوم أفكر فيه تانى و ألاقيه إتغير

بييجى عليا وقت تانى بحس إنى مخننوووق ... فيه حاجز فظيع مليش قدرة إنى أتخطاه

و أوقات تانية بحس إنى مبسوط و مطمئن

.....................................................

مش عارف ليه سكة الراحة مش عايزة تيجى معايا , مع إنى حاسس إنى بسيط جدا فى حياتى و فى تفكيرى برده

لما جيت هنا - أيرلندا يعنى - كنت مبسوط من حاجات كتير بس برده إتخنقت من حاجات كتير

كان قبل كده بيتهيألى إنى لما أسمع المقطع بتاع رومانس لإلياس رحبانى أطير فى حالة من الرضا و تأخذنى نشوة الإرتياح

بس مش على طوول .... مفيش حاجة صح على طول الطريق

مفيش حاجة صح على طول الطريق

.......................................................