تاج تانى

تاج تانى من منيرفا

أحب شخص لقلبك في الدنيا؟إنسان مستعد تضحي بحياتك - ركز فى كلمة حياتك - عشانه؟

أمى .... هى بدون شك إن شاء الله حاليا هى بس .... حتى إشعار أخر

إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفى غليل قلبك؟

ربنا يخلى القوات المسلحة اللى علمتنا نكره و نفضل فاكرين الإساءة لفترات طويلة و كنوع من رد الجميل , أحب أقول إن أول الناس اللى إتعلمت أكرهها هى الصف ضباط يليهم أى حد عند قدرة إنه يوقف المراكب السايرة بسبب أو بدون

على فكرة أنا ماكنتش زمان كده , بس مفيش حاجة فى الدنيا بتمشى على وتيرة ثابتة ... اللى غلط فى حقى يوم , و وقع تحت إيدى فى يوم تانى مش هرحمه

ما هو:اسم أجمل كتاب كتبه بشر قرأته ومحتفظ به حتى الان؟

هو أنا عموما مش قارئ جيد يعنى , بس بحب أقرا لمصطفى محمود ... و فيه كتاب شلة الأنس هو اللى محتفظ بيه - عشان معنديش حاليا غيره الحقيقة

اسم كتاب - كتبه بشر برضه - انت متعلق بيه وبتقرأه كل فترة؟

مفيش

أهم جهاز منزلى أنت متعلق بيه أو بتستخدمه كتير؟

الكومبيوتر

مكان تحس بالراحة عندما تدخله؟

مفيش برده ... حتى البيت مش بطيقه

شيء تحس بالراحة النفسية عندما تنظر إليه؟

الراحة النفسية بالنسبالى كلمة مجردة من أى معانى .... ساعة ما أحس إنى أنا مرتاح مبسألش عن السبب

مكان تحس فيه بالحنين الى شيء لا تدرى ماهو و ذكريات جارفة الى لاشيء؟

حقيقى لسه مروحتوش

اجمل مدينة زرتها داخل مصر ؟

الإسكندرية

أجمل مكان طبيعي رأيته داخل مصر ؟

وادى الريان

شخصية كارتونية بتحبها؟

جونجر و جريندايزر و الليث الأبيض و كنت بحب رود رنر قوى برده

نوع هاتفك المحمول؟

samsung sgh-x480

سرعة بروسيسور جهازك؟

Centrino 1.86

حجم ذاكرة -هارد- جهازك؟

80 G.B.

المساحة التى تشغلها المواد الاسلامية على جهازك؟

1 جيجا بالضبط

نفس المساحة السالف ذكرها فى قلبك -الإجابة لنفسك عشان الرياء يا اخواننا -؟

خلاص انا موافق الإجابة لنفسى

أهم هدف انت واضعه لحياتك الآن؟

إنى أخد الدبلومة و أقدر أخد الماجستير إن شاء الله

مواصفات فتى \فتاة الأحلام بالنسبة لك ؟

إنها تكون بتحبنى - و ده شرط فى حد ذاته مشكلة - و تكون مؤمنة بيا , زى ما انا هكون مؤمن بيها و هحاول أشيلها فوق دماغى لو مكنش كل ده كلام نظرى يعنى و من الناحية الشكلية تكون عاجبانى - مش مهم بقى المواصفات الدقيقة على غرار العينين لونها إيه و الشعر لونه إيه و الحواديت دى - المهم تكون كلها على بعض عاجبانى , و لازم انا كمان أكون عاجبها , عشان هى بشر برده و نفسها فى اللى نفسى فيه

صف ما يأتى:شعورك لما بتسمع كلمة مصر ؟

بكتم جرح مفتوح فى قلبى , سببه خنجر مسموم إسمه الحكومة

شعورك لما بتسمع كلام عن اليهود؟

بفتكر نقض العهود فورا

شعورك لما بتشوف ظابط شرطة؟

مش بحس بأى حاجة - على الرغم من إن ده غلط - لإنى المفروض لما أشوفه أطمن , و مبقاش خايف منه أكتر من البلطجى

شعورك لما بتشوف الكناس العجوز فى الطريق؟

مفيش أى مشاعر

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

براحته , أهم حاجة يكون اللى فى دماغه لصالح الدين فعلا مش لصالح أى حاجة تانية

إحساس يراودك فى إشارة مرور مغلقة بسبب مسئول كبير؟

حسبى الله و نعم الوكيل

أمرر التاج ده لــ

وليد
أميرة
ميراج

أحـــــلام

النهارده كنت فى الكلية عندى إمتحان ,, و بعد ما خلصت , طلب منى بعض أصدقائى المعيدين بالقسم إنى أجى معاهم عشان أراقب معاهم فى إمتحان لسنة تالتة ... رحت معاهم , و يا رتنى ما كنت رحت

اللى ميعرفش فيكم - و معظمكم غالبا ميعرفش - إنى أنا كنت بدى كورسات عندنا فى الكلية , و كنت ببقى مبسوط قوى و أنا شغال فى الشغل ده, يعنى كنت بحس فيه إنى بعمل حاجة حلوة و أنا بحبها , و خاصة إن أنا تم إختيارى ليها مش انا اللى دورت عليها


اللى فكرنى بالموضوع ده , طالبة شفتها النهارده - قبل الإمتحان - , و سلمت عليا بحرارة و إستغربت إنها فاكرانى .... و ساعتها قلبت عليا المواجع , و لما دخلت اللجنة , لقيت كومة كبيرة من الطلبة كانوا عندى .... و ساعتها كانت فكرة واحدة اللى على بالى ,هل هييجى يوم من الأيام و أستعيد الأيام دى ؟!؟ .... أنا بجد واحشنى التدريس فعلا .... و أنا فى الجيش دلوقتى والأيام بتعدى , و مش عارف بعد كمان سنة هبقى فين

بجد إحساس حلو قوى إن الواحد يعمل حاجة , و لو ولحد بس يفتكره بيها ,

و يدعى و يقول ... ربنا يكرم أحمد السعيد .... ده نفعنا , ربنا يجازيه خير

يا ترى الأيام دى هتيجى و خلاص راحت ؟!؟

يا ترى هعرف أخد الماجستير و لا لأ ؟!؟

نفسى أبتدى أدور على نفسى تانى ... و نفسى أكتر

إنى ألاقيها

إمتحانـــــــــات

أنا هبتدى إمتحانات من بكره يا جماعة
الإمتحانات دى أهم عندى من إمتحانات الكلية
إدعولى يا جماعة ..
أنا هحتاج كل دعوة منكم .. و الدعاء بظاهر الغيب مستجاب

ربنا يوفقنا جميعا